Julie kom til Bergen i 2016 som nyutdanna sjukepleiar. Sju år seinare er ho assisterande einingsleiar, og kan sjå fram til at teknologien kan støtta ein stadig meir krevjande kvardag. Vegen dit har vore bratt, men naudsynt.
I 2022 tok dei imot heile 44 000 pasientar - eit gjennomsnitt på rundt 128 pasientar i døgnet, tre år før estimert tidspunkt. Det er pasientgruppa i alderen 25 til 40 som har hatt den største auka, og typen skade på innkomne pasientar avhenger mykje av årstida.
Pasientinnsyn og logistikk bidreg til tryggare behandling og ressursutnytting
Takka vere ny teknologi, blir dei tilsette ved akuttmottaket no varsla om innkomst av pasientar gjennom automatiske meldingar.
-Før måtte me fysisk gå inn i ein journal og lese, men no har me program som på ein måte hentar ut den informasjonen utan at me må inn i sjølve journalen. Den neste utfordringa er plassering av pasientane.
-Det er veldig mange som skal gjennom oss, og vidare til sjukehuset eller heim att. Så ei oversikt over logistikk kan bidra til at ein raskare får sendt dei vidare til dømes avdeling for kardiologi.
Samarbeidet med utviklarane og resten av teamet i Helse Vest går som smurt, i følgje Julie.
-Det me melder inn av feil blir teke på alvor og undersøkt, og blir retta opp i – anten med ein gong, eller som del av ein oppdatert versjon. Gjennom samhandling mellom oss klinikarar og Helse Vest IKT kan vi sjå kva som manglar i dag og som må løysast framover
Akuttmottak samarbeider nasjonalt: Digitalisering tvinger fram nye arbeidsrutinar
Det blir samarbeida nasjonalt for ei felles digital satsing og felles rutinar.
-Me er avhengige av å dra nytte av informasjon, og det er klart at det er kjekt at me på tvers av heile Noreg kan sitja saman og diskutera. Me ser jo kor ulikt me gjer det i dag på akuttmottaka. Me får jo dei same pasientkategoriane og skal behandla dei på same måte. Men alt som er rigga rundt det, kan kanskje endra seg i framtida, og ein får felles, meir standardiserte rutiner.
Ulik takt: Erfaring byggjer tryggleik og nye forventningar
Erfaringsmessig er det ein del skepsis knyte til overgangen til digitale løysingar. Julie meiner det ofte handlar om manglande erfaring og frykt for det ukjente. Men gjennom erfaring skapast ein ny plattform for tryggleik, - når ein opplever fordelane med dei digitale systema.
-Eit akuttmottak er på ein måte rigga i sine rutinar, og me har kanskje ikkje vore så positive til å endra på systema våre tidlegare, for alt handlar jo om tryggleik. Mange var svært imot å gå over til digitale løysingar for både kurver og dokumentasjon. Men om nokon no skulle ta det frå oss, trur eg dei fleste ville protestert.