Pasientens prøvesvar

Pasientens prøvesvar er ei nasjonal løysing som gjer det mogleg å dele laboratorie- og radiologisvar mellom helsepersonell, uavhengig av behandlingsnivå, kven som har rekvirert undersøkinga og kvar ho er utført. 

Løysinga bidreg til betre informasjonsdeling, reduserer behovet for gjentekne prøver og undersøkingar, og legg til rette for ei meir effektiv og samanhengande pasientbehandling.

Prøvesvara blir viste i Kjernejournal, slik at helsepersonell med tenestleg behov får trygg og enkel tilgang til relevant informasjon. Pasientar kan òg sjå eigne prøvesvar på Helsenorge.

Meir informasjon

På Helsedirektoratet si side om Pasientens prøvesvar finn du informasjon om den nasjonale innføringa, venta genvinstar og vidare utvikling av løysinga.

På Norsk helsenett si informasjonsside om Pasientens prøvesvar finn du informasjon om tenesta, teknisk oppsett, rettleiingar og svar på vanlege spørsmål. Der finn du òg informasjon retta mot rekvirentar.

Dersom verksemda di enno ikkje har teke i bruk Pasientens prøvesvar, kan du bestille tilgang til Pasientens prøvesvar hos Norsk Helsenett. Der finn du òg rettleiing om korleis de deler eigne prøvesvar og får tilgang til prøvesvar som er delte frå andre verksemder.

Har du spørsmål om Pasientens prøvesvar i Helse Vest, finn du kontaktinformasjon til prosjektleiar øvst til høgre på denne sida.

Private aktørar

Alle private legekontor og avtalespesialistar som rekvirerer elektronisk via Interactor til laboratoria i Helse Vest, deler prøvesvar gjennom Pasientens prøvesvar.

Kommunale aktørar

Følgjande kommunar deler prøvesvar frå kommunale legekontor:

• Stavanger kommune (alle kommunale legekontor)
• Austevoll kommune (alle kommunale legekontor)
• Alver kommune (eitt kommunalt legekontor)

Følgjande kommunar arbeider med å ta i bruk løysinga for sine kommunale legekontor:

• Vaksdal kommune
• Gloppen kommune

På sikt er målet at òg andre kommunale helsetenester skal dele prøvesvar gjennom Pasientens prøvesvar. 

Spesialisthelsetenesta

Det pågår eit omfattande nasjonalt arbeid med å inkludere sjukehusrekvirerte prøvesvar i Pasientens prøvesvar.

I Helse Vest er utprøving av sjukehusrekvirerte prøvesvar planlagd mot slutten av 2026.

Det er berre prøvesvar frå rekvirentar som deltek i Pasientens prøvesvar, som blir delte.

Elektronisk rekvirerte prøver

I Helse Vest blir prøvesvar frå dei fleste fagområda delte. Dette gjeld: 

• Biokjemi
• Mikrobiologi
• Farmakologi
• Immunologi
• Transfusjonsmedisin*
• Patologi (berre cytologi)
• Bildediagnostikk (radiologi og nukleærmedisin)

*Prøvesvar frå transfusjonsmedisin i Helse Bergen blir delte frå hausten 2026. 

Det pågår eit nasjonalt arbeid med å inkludere andre patologisvar (histologi og molekylærpatologi) og svar frå medisinsk genetikk. Desse blir tilgjengelege når vising i Kjernejournal og Helsenorge er klar.

Papirrekvisisjonar

Det pågår arbeid med tekniske og praktiske løysingar for å gjere det mogleg å dele prøvesvar rekvirerte på papirrekvisisjonar.

Hausten 2025 starta ei utprøving med deling av prøvesvar frå papirrekvisisjonar for porfyrisjukdommar. Hausten 2026 blir utprøvinga utvida til å omfatte fleire papirrekvisisjonar frå andre fagområde.

Rekvirentar som deltek i Pasientens prøvesvar, får tilgang til eigne felt i Interactor. Her kan du styre om prøvesvar skal delast, føremålet med rekvisisjonen og når prøvesvara blir tilgjengelege for pasienten og anna helsepersonell.

Sjå informasjonsfilmen under for ei gjennomgang av funksjonane.

Standardinnstillingar

Interactor er sett opp med standardinnstillingar som automatisk blir brukte når du rekvirerer prøvar. Du treng ikkje å endre desse dersom standardinnstillingane er tilstrekkelege.

Standardinnstillingane er:

• 0 dagar utsett innsyn - dei aller fleste prøvesvar
• 14 dagar utsett innsyn - tumormarkørar, patologisvar, radiologisvar og nuklærmedisin
• 90 dagar utsett innsyn - andre analysar innan medisinsk genetikk

Ei fullstendig oversikt over når ulike prøvesvar blir tilgjengelege for pasientar, finn du på Norsk helsenett si nettside om utsett innsyn for innbyggjarar på Helsenorge.

Innstillingar for deling av prøvesvar

Når du rekvirerer prøvar i Interactor, finn du innstillingane for Pasientens prøvesvar ved å utvide feltet under menyen med arkfaner.

 Her kan du styre følgjande:

Føremål med rekvisisjonen

• Helsehjelp
• Blodgivarprøve (blir ikkje delt)
• Rettsmedisinsk prøve (blir ikkje delt)
• Sanksjonær prøve (blir ikkje delt)
• Forsking (blir ikkje delt)
• Livsstilsføremål (blir ikkje delt)

Reservasjon mot nasjonal deling

Viser dersom pasienten har reservert seg mot nasjonal deling av prøvesvar.

• Ingen reservasjon
• Reservasjon (blir ikkje delt)

Innsyn for pasienten

• Standard utsetjing (sjå standardinnstillingane ovanfor)
• Tilgjengeleg umiddelbart
• Nekta innsyn – fare for liv
• Nekta innsyn – klart utilrådeleg
• Nekta innsyn – etter eige ønske
• Utsett innsyn for innbyggjar (vel tal på dagar)

Endringar du gjer gjeld berre den aktuelle rekvisisjonen.

For å kunne sjå delte prøvesvar må verksemda di ha bestilt tenesta Pasientens prøvesvar hos Norsk helsenett. Korleis dei delte prøvesvara blir viste, avheng av kva journalsystem de bruker.

Du kan allereie no sjå delte prøvesvar for eigne pasientar frå verksemder som deltek i Pasientens prøvesvar. Nytteverdien av løysninga vil auke etter kvart som fleire verksemder tek løysinga i bruk og fleire prøvesvar blir delte.